Bartamaha (Boosaaso):- Kooxaha dilka ku caan noqday ayaa Xalay dil bareer ah u gaystay Suldaan si weyn looga qadariyo Magaalada Boosaaso.
Dablay Bistoolado ku hubaysan ayaa Xalay abaara 8:00-Fiidnimo dil bareer ah u gaysatay Allaha u naxariistee Suldaan Ciise Xasan Cumar oo la dilay isaga oo Masjid ka soo baxay.
Suldaanka ayaa la xaqiijiyay in Bistooladley ay dil bareer ah ugu gaysteen afaafka hore masjid ku yaala xaafada uu suldaanka daganaa xiligaasi oo uu ku soo dukaday Salaada Cishaha.
Raga dilkaasi gaystay ayaa waxa ay isaga carareen goobta ka gadaal markii ay geeri ku hubsadeen Suldaanka waxaana rasaasta ay kala beegsadeen madaxa iyo qeybaha kale ee jirkiisa.
Allaha u Naxariistee Suldaanka la dilay ayaa ahaa Nabadoon aad looga qadariyo dhulka Puntland isagoo ka soo jeeda Magaalada Boosaaso oo xalay ay ku dileen kooxda hubaysan.
Goobta dilka uu ka dhacay ayaa waxaa saacada ka dib soo gaaray Ciidanka Ammaanka Puntland wallow aanay ku guulaysan qabashada dablayda dishay Suldaanka.
Ma aha markii ugu horaysay ee nin dhaqanka lagu qadariyo loogu gaysto Boosaaso waxaana horay loo dilay Nabadoono caan ah iyo rag Xildhibaana ah.
Xafiiska www.Bartamaha.Com Ee Bariga Afrika.
.
