Bartamaha(Gaal-kacyo):-Kooxo hubaysan oo xalay nin kala baxay gurigiisa Gaal-kacyo ayaa maydkiisa maanta soo dhigay duleedka Magaaladaasi.
Dad socota ah ayaa duhurnimadii maanta helay maydka nin dhalinyara wadaad ah kaasi oo xalay lagala baxay Magaalada Gaal-Kacyo guri uu ka daganaa ka dibna maydkiisa la soo dhigay duleeda magaalada.
Ninka la dilay ayaa oogadiisa la sheegay in ay ka muuqatay jirdil xoogan iyo rasaas markii danbe lagu dilay iyadoo warar hoose ay sheegayaan in ninkaasi ay dileen Ciidamo Sirdoonka Itoobiya ka mid ah.
Maalmihii ugu danbeeyay dilalka inta badan ka dhacayay woqooyiga Gaal-Kacyo waxaa lagula dhaqaaqayay dadka ka yimid dhanka dhulka Soomaalida ay Itoobiyo Maamulato kuwaasi oo la sheegay in ay baacsanayaan sirdoonka Itoobiya oo Puntland saldhigtay.
Ammaanka magaalada ayaa isbadal laga dareemayay saacadihii ugu danbeeyay ka dib markii Ciidamada Booliiska ay soo buuxiyeen dhammaan Xaafadaha Magaalada iyagoo baaraya kooxaha dilalka ka danbeeya.
Xafiiska Bartamaha Wararka Soomaaliyeed www.Bartamaha.Com
Muqdisho-Somalia.
