Bartamaha(Tayeeklew):-Ciidamada Alshabaab iyo kuwa Xizbul Islaam ayaa isku horfadhiya Deegaanka Tayeeklow Ee Gobolka Bakool halkaasi oo Xaalad Cabsi dagaal ay ka taagantahay.
Wararka ka imaanaya Deegaanka Tayeeglow Ee Gobolka Bakool ayaa sheegaya in halkaasi ay isku horfadhiyaan Ciidamada Labada Koox Ee Islaamiyiinta ka mid ah kuwaasi oo dagaal laga cabsi qabo in uu dhexmaro.
Dadka Deegaanka ayaa sheegaya in Ciidamada Alshabaab ay soo buuxiyeen Deegaanka islamarkana laga dalbaday Ciidamada Xizbul Islaam in ay ka baxaan Tayeglow taasi oo keentay Xaalada Cabsida ah.
Labada Koox ayaa dhinac walba uu wadaa abaabul dagaal oo Saacad walba rasaas laga baqanayo mararka qaar ayaa la sheegay in labada dhinac ay rsaas hawada u ridayaan taasi oo sabab ka dhigtay Barakac ay bilaabaan dadka deegaanka.
Illaa haatan ma jiro wax rajjo wada hadal iyo dhexdhexaadin laga dhex bilaabay labada Koox iyadoo la Xaqiijiyay in Ciidamada Xizbul Islaam ay diideen in ay ka baxaan deegaanka hubkana iska dhigaan.
Xiisadan hadda ka taagan Gobolka Bakool ayaa waxa ay qeyb ka tahay Khilaafaad la sheegay in uu si guud uga dhex dilaacay Kooxaha Alshabaab iyo Xizbul Islaam kuwaasi oo dhawaan Kismaayo ku dagaalamay.
Xafiiska Bartamaha Wararka Soomaaliyeed www.Bartamaha.Com
Muqdisho-Somalia.
