Xildhibaan Saalax Badbaado oo Maanta Suuqa Bakaaraha Shirjaraa’id ku qabtay.

 

Bartamaha(Muqdisho):-Xildhibaan Saalax Nuur Badbaado oo dhawaanahan laga waayay Deegaanada ay Dowlada maamusho ayaa maanta waxa uu saxaafada kula hadlay gudaha Suuqa Bakaaraha.

Xildhibaan Saalax Nuur Badbaado ayaa duhurnimadii maanta Bakaaraha lagu arkay isagoo saxaafada u yeeray ka dibna shaaca ka qaaday in uu isaga baxay Dowlada KMG ah.

Saalax Badbaado ayaa hadalo kooban siiyay Saxaafada isagoo sheegay in uu go’aansaday isaga bixida Dowlada waxa uuna si xoogan u weeraray dhaqanka Ciidanka Dowlada iyo Madaxda sar sare Ee Dowlada Soomaaliya.

Xildhibaanka ayaa maalintii Khamiista ee la soo dhaafay isaga soo tagay Deeganada ay Dowlada maamusho iyadoo la hadal haayay in uu alshabaab ku biiray wallow maanta warkaasi uu dhab noqday.

Ex-Xildhibaan Badbaado ayaa waxaa ilaaladiisa ay ahayeen Ciidamada Alshabaab oo la xaqiijiyay in uu si rasmi ah ula midoobay isagoo astaamo badan maanta muujinayay xiliga uu saxaafada kula hadlayay Bakaaraha isagoo weeraray qaab dhaqanka Madaxda Dowlada.

Waa Xildhibaankii ugu horeeyay ee isku dhiiba Kooxda Alshabaab wallow horay Ciidamo iyo Saraakiil ka tagtay dhanka Dowlada ay ku biiri jireen Kooxaha Islaamiyiinta Mucaaradka ku ah Dowlada.

Xafiiska Bartamaha Wararka Soomaaliyeed www.Bartamaha.Com

Muqdisho-Somalia.