Bartamaha (Muqdisho):- Xiisad iyo abaabul dagaal ayaa laga dareemayaa Suuqa Bakaaraha iyo Deegaano kale oo ay wada joogaan Kooxaha ALshabaab iyo Xizbul Islaam iyadoo maanta la soo bandhigay rag ay miino la qaraxday xilli ay dhigayeen meel ku dhow Bakaaraha.

Xiisad Colaadeed ayaa ka dhex oloolsan Kooxaha Shabaab iyo Xizbul Islaam ka dib markii maanta saxaafada loo soo bandhigay maydadka 3-nin oo ka mida Xizbul Islaam kuwaasi oo ay la kacday Miino ay doonayeen in ay ku aasaan meel ku dhow Isgoyska Baar Ubax.

Saraakiil Shabaabka ka mida ayaa soo bandhigay 3-nin oo mayd ah oo ay ku qaraxday Miino ay dhigayeen Baar Ubax si ay ula beegsadaan Kooxda Alshabaab saraakiishooda oo si weyn u mara wadada Miinada lagu aasayay oo ku dhow suuqa Bakaaraha.

Xiliga ay saxaafada ku sugnaayeen Bakaaraha oo loo soo bandhigayay Maydadka miinada la qaraxday ayaa waxaa goobtaasi soo gaaray Ciidamo ka mida Xizbul Islaam oo rasaas la beegsaday askartii Alshabaab taasi oo keentay in goobta laga kala cararo.

Xaafadaha ay wada joogaan labada Koox ayaa waxaa lagu arkayaa Ciidamo xoojin ah oo ay koox waliba soo dhoobatay si ay isaga caabiyaan weerar koox waliba ay ku qaadi karto Kooxda kale maadaama ay cadaawad muuqata maanta ku dhex martay Suuqa Bakaaraha.

Wixii ku soo kordha Xaalada Suuqa Bakaaraha iyo Magaalada inteeda kale kala soco www.Bartamaha.Com

 

 

 

 

 

 

 

 

 

 

 

 

 

 

 

 

Xafiiska Bartamaha Wararka Soomaaliyeed www.Bartamaha.Com

Muqdisho-Somalia.

Comments

comments