July 11, 2011——Wefdi sare oo ka socday dowladda Talyaaniga ayaa shalay soo gaaray magaalada Muqdisho iyadoo ay kulamo la qaateen madaxda ugu sareysa Dowladda waxayna sidoo kale kormeer ku tageen Xaruntii Wasaaradda Arrimaha Dibadda oo ku taala KM5 Degmada Hodon.

 Wefdigan oo uu hor kacayay Wasiiru dowlaha Wasaaradda Arrimaha Dibadda Talyaaniga Mudane Alfredo Mantica ayaa waxaa kaloo xubno ka ahaa Safiirka Dowladda Talyaaniga u fadhiya Safaarada Soomaaliya Stefano DJek, Agaasimaha guud ee Wasaaradda Arrimaha Dibadda Talyaaniga iyo sarkaal sare oo dhanka Ammaanka ah.

Wefdiga ayaa ugu horeyn kulan la qaatay Ra’iisul Wasaaraha Xukuumada Mudane Dr. C/weli Maxamed Cali waxaana ku wehlinayay Wasiirka Arrimaha Dibadda Mudane Maxamed Cabdullaahi Oomaar, R/Wasaare kuxigeenka ahna Wasiirka Gaashaandhigga Mudane C/xakiin Fiqi, Wasiirka Caafimaadka Dr. Aadan iyo saraakiil ka tirsan Xafiiska R/wasaaraha, waxaana R/wasaaruhu uu warbixin ka siiyay xaaladdaha wefdiga arrimaha Amniga, Abaaraha iyo xiriirka Dowladdaha Soomaaliya iyo Talyaaniga, iyagoo dhankoodana wefdiga Talyaanigu ay warbixin ka siiyeen socdaalkooda iyo muhiimada ay u leedahay.

 Sidoo kale, wefdiga ayaa u sii gudbay Xafiiska Guddoomiyaha Baarlamaanka Mudane Shariif Xasan Sh. Aadan halkaasoo ay kula kulmeen guddoomiyaha iyo xildhibaano ka tirsan Baarlamaanka.

Waxaa kale oo ay kulan albaabadu u xiran yihiin la qaateen madaxweynaha Dowladda Federaalka KMG ah ee Soomaaliya Mudane Sheekh Shariif Sh. Axmed waxayna ka wadahadleen arrimo ku saabsan gargaarka Bani’aadaminimo ee shacabka Soomaaliyeed oo ay ku dhufteen abaaro xoogan oo dad iyo duunyaba saameyn ballaaran ku yeeshay isagoo madaxweynuhu ka codsaday in gar gaar deg deg ah loo fidiyo shacabka Soomaaliyeed.

Ugu dambeyntiina wefdiga ayaa u sii gudbay Xaruntii Wasaaradda Arrimaha Dibadda Soomaaliya oo ku taala KM5 waxayna halkaasi faah faahin uga bixiyeen ujeedada safarkooda iyo balanqaadyo ay halkaasi ku sameeyeen.

 Wasiiru Dowlaha Arrimaha Dibadda Mr. Alfredo Mantica ayaa sheegay in ujeedada safarkoodu uu ahaa sidii ay u soo kormeeri lahaayeen xaaladda dhabta ah ee Soomaaliya gaar ahaana hay’addaha Dowladda KMG ah wuxuuna xusay in sidoo kale ay safarkooda uga gol leeyihiin sidii ay uga qeyb qaadan lahaayeen taageero dhaqaalena ugu bixin lahaayeen marxaladda abaaraha ee ka jira dalka.

 “Anigoo ka faa’iideysanaya fursadan waxaan halkan ka balan qaadayaa in 2.5 Milyan Eouro aan ugu talo galnay dib u dhiska Isbitaalkii Martiini si shacabka Soomaaliyeed ay uga helaan adeeg caafimaad, sidoo kalena waxaan halkan ka cadeyneynaa inaan u qoondeynay 1 Milyan oo Euro inaan ku bixin doono arrimaha gargaarka Bani’aadaminimada” ayuu yiri Mr. Alfredo.

Dhinaca kale, wuxuu ugu baaqay dhamaan hay’addaha Caalamka iyo kuwa Q/midoobay inay gar gaar deg deg ah fidiyaan shacabka Soomaaliyeed isagoo xusay in marxalada haatan dalka Soomaaliya ka jirta ay mudan tahay taageero.

Dhinaca kale, waxa uu sheegay Mr. Alfredo in dowladda Talyaanigu ay dhowaan ka furan doonto gudaha magaalada Muqdisho Safaaradooda taasoo uu sheegay inay rajeynayaan in si rasmi ah ay kor ugu qaado xiriirka labada wadan “Waxaan rajeyneynaa in safaaradeenu ay soo degto kuna shaqeyso gudaha magaalada Caasimadda ah ee Muqdisho” ayuu yiri Wasiiru wuxuuna rajeeyey inay ku dayan doonaan safaarado badan oo dowladdaha Yurub ka mid ah.

xafiiska wararka bartamaha : muqdisho

Comments

comments