Muqdisho, July 2, 2011——Ra’iisul Wasaaraha Xukuumada Federaalka KMG ah ee Soomaaliya Mudane Dr. C/weli Maxamed Cali ayaa maanta markii ugu horeysay booqasho ku tegay furimaha hore ee ay ku sugan yihiin ciidamada Dowladda Federaalka KMG ah ee Soomaaliyeed, gaar ahaana kuwa degmooyinka Hodon iyo Howlwadaag.

Ra’iisul Wasaaraha ayaa waxaa kormeerkiisan ku wehlinayay R/wasaare kuxigeenka ahna Wasiirka Gaashaandhigga Mudane  C/xakiin Maxamuud Xaaji Fiqi, Wasiir kuxigeenka Warfaafinta Maxamed Cabdulle Geesey, Taliyaha Guud ee Ciidanka Xooga Jen. C/qaadir Sh. Cali Diini, Afhayeenka Xukuumada Eng. C/raxmaan Yarisow iyo Agaasimaha Xafiiska R.wasaaraha Abuukar Daahir Cismaan iyo weliba saraakiil kale oo ka socotay ciidanka nabad illaalinta ee AMISOM.

Ra’iisul Wasaaraha ayaa kormeerkiisa ka bilaabay degmada Howlwadaag gaar ahaana Masaajidkii Macalin Biyamaalow halkaasoo uu salaan uga qaatay saraakiil ka tirsan ciidanka Xooga, isagoo uga sii gudbay Xaafada K.P.P isagoo lug ku maray wadada dheer ee Wadnaha illaa uu ka gaaray isgoyska K.P.P iyo Masaajidkii Sheekh Cali Suufi.

Sidoo kale Ra’iisul Wasaaraha ayaa kormeerkiisa ku tegay Wasaaradii Gaashaandhigga oo ay ku sugan yihiin ciidamada Dowladda iyo kuwa Burundi wuxuuna R.wasaaruhu halkaasi salaam sharaf uga qaatay Askar ka tirsan  Burundi isagoo R.wasaaruhu kormeeray qeybaha kala duwan ee Wasaaraddu ka kooban tahay.

Shir jaraa’id oo ay si wada jir ah ugu qabteen Xarunta Wasaaradda Gaashaandhgiga R.wasaaraha iyo R.wasaare kuxigeenkiisa ayay ku sheegeen in booqashadooda ay uga gol lahaayeen sidii ay u soo kormeeri lahaayeen horumarka ay bilihii ugu dambeeyey ka sameynayeen ciidamada xooga iyo kuwa Nabad illaalinta ee AMISOM.

“Waxaan aad ugu faraxsanahay inaan maanta soo booqdo goobaha ay ku sugan yihiin ciidamada xooga dalka iyo kuwa AMISOM, maanta inaad halkaan joogtaan waxay calaamad u tahay in guushu soo dhowaatay oo magaalada intii badneyd aad gacanta ku dhigteen, waxaana rajeynayaa in aad ka dhaqaaqdaan halkaan aad maanta joogtaan oo aad si guud ahaan magaalada u qabataan oo aad nabadeysaan si dadka masaakiinta ahi ay guryahooda dib ugu soo laabtaan” ayuu yiri Mudane C/weli oo guul u rajeeyey ciidanka xooga dalka Soomaaliyeed.

xafiiska wararka bartamaha : muqdisho

Comments

comments