Bartamaha (Caabud-Waaq):-Dhacdadan oo ah mid ay aad ula yaabeen shacabka Reer Caabud-waaq ayaa waxa ay xalay ka dhacday Deegaankaasi ka dib markii nin uu toorey ku dilay Seedigiis dacwad yar ka dib.

Wararka naga soo gaaraya Degmada Caabud-waad Ee Gobolka Gal-gaduud ayaa tibaaxaya in xalay halkaasi ay ka dhacday dhacdo mucjiso leh ka dib markii nin dhalinyara ah uu dil u geystay Seedigiis dacwad kaga timid walaashiis aowgeed.

Ninka dilay xalay Seedigiis ayaa la sheegayaa in ay u soo dacwootay walaashiis taasi oo ka cabanaysay biil xumo bisha Ramadaan ah oo ninkeeda ka soo wajahday iyadoo la sheegay in ay is afdhaafeen labada nin ka dibna gacan ka hadal uu bilowday.

Ciise Yaasiin oo ahaa ninka qabay gabadha ayaa u sheegay walaalkeed in aanay wax dhibaata ah haynin walaashiis taasi oo loo aaneeyay in gacan ka hadalka uu ku bilowday sida dad goobjoogayaal ah sheegeen iyadoo Ninka seedigiis dilay la xaqiijiyay in Toorey oo laba meelood kaga dhiftay taasi oo keentay in uu geeriyoodo Ciise Yasin.

Ciidamada Ammaanka Kooxda Ahlu-sunnah wal-jamaaca ayaa gacanta ku soo dhigay ninka dilka u geystay seedigiis iyadoo afhayeen u hadlay Ciidamada Maamulka deegaanka uu sheegay in la maxkamadeyn doono ninka dilka geystay.

Dhacdadan ayaa ahayd mid shacabka Caabud-waaq ku nool ay aad ula yaabeen islamarkaana la yaab ku noqotay qaabka falkaasi ku dhacay iyo sida fudeedka ah ee ninkaasi uu Seedigiis ku dilay.

Xafiiska Bartamaha Wararka Soomaaliyeed www.Bartamaha.Com
Muqdisho-Somalia

Comments

comments