Muqdisho_ Madaafiic xoogan ayaa habeenkii xalay laga maqlay qaar kamid degmoyinka magaalada Muqdisho, iyadoona walaac ay ku abuurtay dadka kunool magaalada.

Jugta madaafiicda ayaa  aad looga maqlayey degmooyinka ku xiriirsan Maka Al- mukarama ilaa degmada Madiina, waxaana ilaa iminka la ogayn khasaaraha ka dhashay madaafiicdii xalay.

Guddoomiye ku xigeenka dhanka amniga ee maamulka gobalka Banaadir Warsame Maxamed Xasan (Joodax) ayaa madaafiicdi xalay ku tilmaamay kuwo dheemish ah, waxaana uu xusay in lagu damacsana in lagu khal khal geliyo shacabka.

Warsame Joodax ayaa sheegay inay jiraan shakhsiyaad doonaya inay khad khal geliyaan amniga magaalada, waxaana uu intaasi raaciyay in gacan bir ay kusoo qaban doonaan sharcigana hor keeni doonaan.

Warsame Joodax ayaa sidoo kale tilmaamay in miino lagu xiray guri ay ku noolaayeen caruur uu dhalay  xildhibaan katirsan Baarlamanka, waxaana ay miinadu bur burisay gidaarka guriga.

Habeenadii ugu dameeyay ayaa magaalada Muqdisho waxa ay wajahaysay Madaafiic xoogan oo lagusoo tuuro degmoyinka magaalada, taasi oo jaah wareer ku keentay bulshada magaalada.

Majirto khasaare ilaa iminka la hubo oo kadhashay madaafiicdii xalay ka dhacay Mudisho, inkastoo ay cabsi xoogan ku beertay dadka kunool magaalada oo hurdadu ay seegtay xalay.

www.Bartamaha.com

 

Comments

comments