Madaxweynaha Soomaaliya Xasan Sheekh Maxamuud oo safar shaqo ah ku joogo dalka Maraykanka, ayaa kulamo gaar gaar ah la yeeshay madaxda dowladaha caalamka uga qeyb galaya shirka sanadlaha ee golaha loo dhan yahay ee Qaramada Midoobey.

Madaxweynaha ayaa la kulmay Wasiirka Arrimaha Dibadda ee Boqortooyada Sucuudiga Saud Bin Faisal, kulankan ayaa Madaxweynaha iyo Wasiirku ay uga wada hadleen Arrimaha Nabadgelyada, Dhaqaalaha, iskaashiga xiriirka labada wadan ee soo jireenka ah.

Xasan Sheekh ayaa kala hadlay Wasiirka Arrimaha dibada Sacuudiga Saud Bin Faisal soo celinta Safaaradda Sucuudiga ee Soomaaliya, wuxuuna u sheegay in ku dhowaad 30 Safaaradood ay Soomaaliya ka shaqeeyaan, dowladda Soomaaliyana ay diyaar u tahay sidii ay u meel marin laheyd dib u soo celinta Safaaradda Sacuudiga ee Soomaaliya.

Madaxweynaha Xasan Sheekh ayaa kulan kale la qaatay Kaaliyaha Wasiirka Arrimaha dibadda u qaabilsan Arrimaha Afrika Marwo Linda Thomas Greenfield, wuxuuna warbixin kooban ka siiyey xaaladda Soomaaliya guud ahaan iyo dhanka amniga.

Linda Thomas ayaa sheegtay in dowladda Maraykanka ay ka go’an tahay sidii Soomaaliya ay horay ugu socon lahayd, Dowladda Maraykankuna garab taagan tahay Soomaaliya mar walba ayey tiri Linda Thomas.

Madaxweynaha ayaa lagu wadaa inuu khudbad ka jeediyo Shir Sanadlaha Qaramada Midoobay maalinta Khamiista,wuxuuna kulamo gaar ah la yeelan doonaa madax kala duwan maalmaha inagu soo aadan wuxuuna kala hadli doonaa qaabkii lagu taageri lahay dib u habeynta heyadaha amniga iyo soo celinta nabadda.

Madaxweyne Xasan Sheekh ayaa diirada saaraya arrimaha amniga iyo xiriirka arrimaha dibada, inkastoo lagu dhaliilay in arrimaha gudaha ay waxba ka qaban weyday, gaar ahaan ammaanka oo noqday mid aan la isku haleyn karin.

Comments

comments