Garoowe (www.Bartamaha.com):- Madaxweynaha Dowladda KMG ah Soomaaliya Shariif Sheekh Axmed ayaa kusoo laabtay magaalada Muqdisho kadib Socdaal maalin oo shaley ku tagay magaalada Garoowe ee xarunta maamulka goboleedka Puntland.

Madaxweynaha ayaa Intii uu ku sugnaa magaalada Garoowe waxa uu uu kulamo la qaatay madaxda Puntland iyo wakiilka gaarka ah ee Xoghayaha guud ee QM u qaabilsan Soomaaliya Augustine Mahiga siddoo kale waxa uu kormeeray xerooyinka ay degenyihiin dadka barakacayaasha ah ee Abaarta iyo Colaadaha uga barakacay gobollada Koonfureed ee dalka ee ku nool magaalada Garoowe ayadoo Madaxweynuhu uu dadkaasi Barakacayaasha ah xaaladooda mid mid uga wareystay.

Sidoo kale Madaxweyne Sheekh Shariif Sheekh Axmed ayaa waxa uu kormeeray goobo ay kale oo uu ka mid yahay Isbitaalka magaalada Garoowe halkaasi oo uu dhaqaatiirta Isbitalka ka wareystay qaabka ay dadka daweynta ugu sameeyaan iyo qaybaha uu isbitaalka ka koobanyahay oo uu mid mid usoo kormeeray.

Madaxweyne Sheekh Shariif Sheekh Axmed oo ay wehliyeen Ra’isulwasaaraha Xukuumadda Federaalka Soomaaliya Cabdi weli Maxamed Cali Gaas iyo Madaxweynaha Maamul goboleedka Soomaaliyeed ee Puntland ayaa socod lug ah ku maray bartamaha magaalada Garoowe halkaasi oo ay isugu soo baxeen shacab farabadan oo iyagu madaxweynaha wadooyinka kusoo dhoweynayey.

Gelinkii dambe ee shaley ayaa Madaxweynaha waxa uu saxaafada kula hadlay Xarunta madaxtooyada magaalada Garoowe waxaana uu tilmaamay in uu aad ugu faraxsan yahay socdaalka uu ku tegay Garoowe islamarkaana ay tahay bog cusub oo u furmay DKMG ah iyo Maamulka Puntland.

Sidoo kale Madaxweynaha Maamul Puntland Cabdi raxmaan Maxamed Maxamuud Faroole oo isna ka hadlay shirkaasi jaraa’id ayaa ka dhawaajiyay in uu aad ugu faraxsanyahay Safarka uu Madaxweynaha DKMG ah ku yimid Puntland islamarkaana ay mar walba diyaar u yihiin ka shaqeynta Midnimada umadda Soomaaliyeed.

Si kastaba, waa markii ugu horreysay oo Madaxweynaha Soomaaliya Shariif Shiikh Axmed uu socdaal ku tago magaaladda garoowe tan iyo markii uu noqday madaxweynaha Soomaaliya labo sano ka hor.

          Sawirro Kale:

W/D:Xafiiska Wararka Muqdisho www.Bartamaha.com

Comments

comments