Bartamaha (Nairobi):- Xaflad Caleema Saar iyo dhaarin ah oo aad loo soo agaasimay ayaa Xalay ka dhacday Magaalada Nairobi Ee Dalka Kenya.

Munaasabada Xalay oo ahayd midii ugu balaarnayd ee dhawaanahan lagu qabto Hotelka Caalamiga ah ee Intercontinental  ayaa waxaa ka soo qeybgalay madax kala duwan oo ka kala socday Dowladaha Kenya iyo Somalia.

Madaxda Xaflada ka soo qeybgashay ayaa waxaa ka mid ah:-

Gudoomiye Xigeenka Baarlamanka Kenya Faarax Macalin iyo masuuliyiin ka socotay Dowlada Kenya.

Diplomasiyiinta iyo wakiilada qaar ka mida Safaaradaha Caalamka ee Nairobi iyo Madaxweynihii hore Ee Soomaaliya Cali Mahdi Maxamed iyo Wasiiro iyo Xildhibaano ay ka mid ahaayeen Wasiirkii hore ee arimaha dibada ee dowlada fedralka Ismaciil Moxamuud Hure “Buubaa” iyo Xildhibaanad Caasho Ahmed Abdalla,Xildhibaan Cali Ismaaciil Cabdi Giir iyo madax kale.

Xaflada Xalay ayaa waxaa hadal ka jeediyay madaxdaasi kala duwan oo dhammaan taageera u muujiyay Dowlada Goboleedka Hiiraan State Ee Dalka Soomaaliya.

Shirkani ayaa waxaa ku baxay dhaqaalo lagu qiyaasay 1.2 Million Shilling Kenya money ah oo u dhiganta ilaa 12.500 US dollar taas oo dhaqaalaha xoogooda ay ku baxday Amniga marti sharafta iyo habsami u socodka Xaflada.

Mudo ka dib waxaa hagad la geliyey qudbadahii iyo heesahii waxaana la guda galay dhaarintii madaxweynaha iyo ku xigeenkiisa oo la horkeenay kitaabka ALLE.

Dhaarinta ayaa waxaa dhaarinayay Shiikh Abdulqadir Shiikh Muumin Faarax.waxaana ka mid ahaa dhaart iney calanka iyo ciida Hiran difaaci doonaan, mudadii yareyd ee ay dhaartu socotay ayaa waxaa iskugu yimid meesha ay dhaarta ka dhaceysay in ka badan 35 suxufi oo muuqaalada duubanayay.

Shirweyne si weyn loo sugayey laguna caleema saarayey madaxweynaha iyo madaxweyne ku xigeenka dowlad goboledka Hiran ee Somaliya( Hiran State of Somalia) nayaa waxaa hadal ka jeediyay Gudoomiye Xigeenka Baarlamanka Kenya oo ku dheeraaday samaynta Dowlad Goboledyada.

Faarax Macalin waxa uu si gaar ah u amaanay reer Hiiraan isagoo daaha ka rogay in ay yihiin dadka Soomaalida kuwa jecel gaarida isklu filnaanshaha isagoo amaanay 12-Beel oo dagan Gobolkaasi oo uu xusay in uu Gobolka Hiiraan yahay Gobolka kaliya ee dad intaasi ka kooban ay ku wada Noolyihiin.

Farax Macalin ayaa ku dheeraaday in ay lama huraan tahay in la xoojiyo dowlad goboledyada maadama dowlad kasta oo dibada lagu soo dhiso ay dhaafi weyday caasimada oo kaliya.

Waxa uu masuulkaasi xusay in aanay Kenya eegan doonin dhibaatada ka sii taagan Gobolka isagoo soo hadal qaaday in Gobolka ay ku bexeen rag Muhiim ah sida Col.Cumar Xaashi oo uu ku tilmaamay nin saaxiib dhow la ahaa dhammaan Dowladaha Gobolka Geeska Afrika.

Dhammaan Beelaha dhistay Maamulka ayaa waxa ay ka jeediyeen Fagaaraha hadala qiira Xambaarsan waxa ayna wada muujiyeen sida ay ugu faraxsanyihiin ka shaqeynta Hormarka Deegaanka Hiiraan oo hadda Dowlada Goboleed samaystay.

Dhanka kale Cali Mahdi Maxamed Madaxweynihii hore Ee Dowlada Soomaaliya ayaa tala siiyay Dowlada Hiiraan State waxa uuna ammaanay maamulada Dowlad Goboleedyada haatan la dhisayo.

Madaxweyne Cali Mahdi Maxamed waxa uu shaaca ka qaaday in uu ku qanacsanyahay maamulka haatan ay dhisteen Beelaha dagan Gobolka Hiiraan State.

Xaflada waxaa nasasho daganaan iyo baraarujinba u ahaa Fanaaniin soomaaliyeed oo wacdara ka dhigay bHoolka Shirarka ee Hotelka Caalamiga ah ee INTERCONTINENTAL.

Fanaaniinta ayaa waxa ay soo bandhigeen Heeso la jecleestay sida Hees loogu magic daray BUUNDAWEYN taasi oo si weyn ka qeybgalayaasha ay ula qaadayen fanaaniinta.

Guntii iyo gabagabadii Munaasabada ayaa waxaa hadal jeediyay Madaxweyne Maxamuud Cabdi Gaab oo ah madaxweynaha Dowlad Goboleedka HIRAN STATE OF SOMALIA.

Madaxweynaha waxaa garbihiisa taagnaa ku xigeenkiisa COL.Isxaaq Cali Cabdulle iyo Hablo Soomalaiyeed oo si gaar ah ugu libisnaa dareeska Calanka Somalia iyo Calanka Dowlad Goboleedka Hiiraan.

Madaxweynaha ayaa uga mahad celiyay dhammaan Shacabka reer Hiiraan iyo taageerayaasha Dowlad Goboleedka qaabka ay u muujiyeen taageerada Dowlada.

Madaxweyne Maxamuud Cabdi Gaab waxa uu xusay in shacabka Hiiraan ay yihiin kuwa u baahan Nabada islamarkaana ay Dowlaadiisa balan qaadayso soo celinta Nabadii Luntay ee Gobolka.

Masuulkan waxa uu sidoo kale soo hadal qaaday qorshaha Dowladiisa ee ku aadan Howlgalada ay doonayso in ay ku dhaqaaqo xiliga ugu horayso ee dalka ay gaarto waxa uuna xusay in  ay Dowladiisa Xooga saarayso Dib u Heshiisiin iyo Xureynta Gobolka Hiiran.

Munaasabada ayaa waxa ay ku soo afmeerantay jawi daganaan ah iyadoo amniga goobta Xaflada ahaa mid aad u wanaagsan oo ay gacan ka geysteen Booliiska Dalka Kenya.

Daawo Sawirada:-

Abdirizak Yusuf Kampala

.

Xafiiska www.Bartamaha.Com Ee Geeska Afrika.

Kala xiriir:-

Comments

comments