Maxkamada caalamiga ah ee dambiyada dagaalka ayaa sheegtay inay Kenya ugu yaboohayso caawimaad ku aadan sidii cadaalada loo horkeeni lahaa kooxaha gaystay weerarka lagu qaaday xarunta ganacsiga ee Westgate.

Fatou Bensouda oo ah haweenayda dacwad soo oogaha ka ah maxkamadaasi ayaa qoraal ay soo saartay ku sheegtay in ay naxariis uu muujinayso dadkii ku dhibaatoobay weerarkaas oo ay sheegtay inuu yahay dambi wayn oo maxkamada caalamiga ah ee ICC ay dacwadiisa qaadi karayso.

“Anigoo xushmad ballaaraan u haya garsoorka jamhuuriyada Kenya ayaan u cadaynayaa dawlada Kenya iyo bulshada caalamkaba inaan diyaar u ahay sidii aan dawlada Kenya uga caawin lahaa in cadaalada la horkeeno kuwii ka dambeeyay weerarkan” ayay tiri Bensouda.

Weerarka lagu soo qaaday xarunta Westgate oo aan ilaa iyo hadda lagu guulaysan in lasoo afjaro ayaa waxaa ku dhintay 62 qof halka dhaawucuna uu yahay 175 sida ay shaacisay dawlada Kenya, balse hay’adda laanqayrta cas ee Kenya ayaa dhimashada ku sheegtay 68.

Waxaana maxkamada caalamiga ah ee dambiyada dagaalku ay haatan dacwadi uga socotaa madaxweynaha Kenya Uhuru Kenyatta iyo ku xigeenkiisa William Ruto oo shalay dalka dib ugu soo laabtay kadib markii fasax lasoo siiyay xilli Kenya ay ka taagantahay masiibo ka dhalatay weerarka lagu qaaday xarunta Westgate.

Comments

comments