Madaxweynaha Puntland C/raxmaan Faroole ayaa jeediyay hadal uu ku durayo dawlada federaalka ah ee Soomaaliya oo ay ka muuqato muujinta inaanay hoostagin dawlada dhexe.

Faroole oo hadlayay ka qaybgalka Puntland ee shirka New Deal oo ka dhacaya magaalada Brussels ayaa sheegay in Puntland ay si madaxbanaan shirkaas uga qaybgalayso ugana hadlayso danaheeda gaarka ah iyadoon cidina wakiil ka ahayn.

Inkastoo ay Puntland kaalin muuqata ka qaadatay saxiixitaanka heshiisyadii Soomaaliya looga saaray ku meel gaarka oo lagu soo dhisay dawlada haatan jirta ayaad moodaa in hadalka Faroole laga dhadhansanayay inaanu raali ka ahayn in shirkaas uu ku matalo Soomaaliya Madaxweynaha dawlada Federaalka ah ee Soomaaliya.

“Waan maqlay in Xassan Sheekh uu meelaha ka lahaa shirka halaga soo wada qaybgalo, taasi ma xuma laakiin Puntland ayadaa danaheeda ka hadlaysa oo shirka ka qaybgalaysa” ayuu yiri Faroole.

Waxaana uu hadalkan jeediyay kadib kulan uu la qaatay wafdi ka socda midowga Yurub oo uu hogaaminayay Agaasimaha Midowga Yurub u Qaabilsan Arimaha Africa Nick Westcott.

Comments

comments