Bartamaha (Muqdisho):-Dowlada Fd Soomaaliya ayaa maanta shaaca ka qaaday in ay guula ka gaartay dagaaladii ka dhacay magaalada Muqdisho iyadoo beenisay duqeymo bareer ah oo loo geysto Suuqa Bakaaraha.

Sheekh C/risaaq Qeylow Afhayeenka Ciidamada Daraawiishta Dowlada Fd Soomaaliya oo maanta Muqdisho saxaafada kula hadlayay ayaa waxa uu sheegay in dagaalada ay kaga guuleysteen xoogagii weerarada soo qaaday.

Sheekh Qaylow ayaa sheegay in Ciidamada Dowlada ay saaka iska caabiyeen Kooxaha Mucaaradka ka dib markii ay isku dayeen in ay qaataan maydad xalay ay kaga tageen Wadada Makka Al-Mukarama.

“Ciidamada dowlada ilaahay fadligiis waxa ay ka guulesyeen kooxaha soo weeraray ee nabadda diidan waxa ayna saaka isku dayeen in ay qaataan maydadka ay kaga ordeen wadada Dabka oo xalay ay soo weerareen”ayuu yiri afhayeenka daraawiishta dowlada.

Afhayeenka Ciidamada Daraawiishta ayaa si kulul u beeniyay in dowlada Fd Soomaaliya ay madaafiic ku garaacdo xaafadaha magaalada iyo suuqa Bakaaraha taasi oo uu ku sheegay mid dacaayad laga fidiyay Dowlada Soomaaliya ah.

Isku soo duube guulaha ay Dowlada Fd Soomaaliya ay ka sheegatay dagaalada ka dhacay magaalada ayaa waxa uu ku soo aadayaa xilli 48-kii saacadood Ee ugu danbaysay Magaalada Muqdisho ay dagaalo qaraar ka dheceen kuwaasi oo dad badan ay ku nafwaayeen.

Xafiiska Bartamaha Wararka Soomaaliyeed www.Bartamaha.Com

Muqdisho-Somalia.

Comments

comments