Madaxweynihii hore ee Puntland Gen. Cadde Muuse Xirsi ayaa si kulul uga jawaabay eedayntii uga timid madaxweynaha talada haya C/raxmaan Faroole oo ku eedeeyay inuu maleegay rabshadii ka dhacday magaalada Qardho ee sababtay in la joojiyo doorashooyinkii dawladaha hoose.

Cadde Muuse ayaa sheegay inuu u yimid Puntland sidii uu isugu soo dhawayn lahaa beelaha kala duwan iyo midaynta shacabka isagoo ku eedeeyay Faroole inay u kala gooyay Puntland beel beel la isuna socon waayay.

” Dadkii waa kala gooyay Puntland waa baaba’santahay, anna waxaa la igu yaqaan inaan ahayn nin nabadda ka shaqeeya oo shacabkaa ii yeeray si aan u dhexdhexaadiyo” ayuu yiri Cadde Muuse oo ku sugan magaalada Qardho.

Cadde ayaa sidoo kale ku eedeeyay Madaxweyne Faroole in uu qaab beeleed ahaan ugu soo duulay magaalada Qardho iyadoo la doonayay in qaab dawladeed loo xalliyo khilaafaadka taagan.

“Isaga ayaa qaab beeleed isugu soo duulay Qardho, dadkan hub isugu dhiibay” ayuu yiri Cadde Muuse.

Gen. Cadde Muuse Xirsi oo ah madaxweynihii ka horreeyay Faroole ee xilka madaxtinnimada soo maray ayaa ka jawaabayay eedayn kaga timid madaxweyne C/raxmaan Maxamed Maxamuud Faroole.

Comments

comments