Bartamaha (Muqdisho):- Sida warar xaqiiqda ku salaysan aynu ku helnay waxaa la jabsaday qaar ka mida Bakhaarada Hubka Ee Villa Somalia oo la la’yahay halkii lala aaday Hubkii yaalay.

Sida xog hoose oo aynu helnay ay cadaynayso waxaa la jabsaday Laba Bakhaar oo ay si gaar ah u lahaayeen Ilaalada Madaxtooyada Soomaaliya oo laba Cisho ka hor laga rartay Hubkii yaalay.

Bakhaaradan ayaa waxa ay ka mid  ahaayeen Bakhaarada kooban oo ay furahooda haayeen Saraakiisha Ciidanka Dowlada KMG ah waxaana la hadal haayaa in hubkaasi ay Iibsadeen ilalada madaxtooyada oo qaarkood la la’yahay halkii ay aadeen.

Saraakiisha Ciidanka Amisom ee u xilsaaran Ilaalinta amniga Madaxtooyada ayaa amray in la xero taliye Ciidan oo magaciisa lagu soo koobay Taliye Afweyne iyo qaar ka mida saraakiisha ilaalada Villa Somalia si raadraac loogu helo halkii uu ka baxay Hubkaasi.

Hubka la rartay oo u badnaa qoryaha fudud iyo rasaas aan cadadkeeda la xisaabi Karin oo laga waayay Bakhaaradaasi ayaanan la ogayn halkii la geeyay wallow la aaminsanyahay in ay Iibsadeen Saraakiil ka mida ilaalada Villa Somalia.

Bakhaarada la jabsaday ayaa imaanaysa xilli dagaalo qaraar ay ka socanayeen Woqooyiga magaalada Muqdisho oo ay dagaalada socanaya u xilsaaranyihiin ilaalada Madaxtooyada iyo saraakiisha ay Ehel wadaagta yihiin madaxweyne Shariif.

Wararka iyo warbixinadan oo ah kuwa isa soo taraya ayaa waxaad kala socon kartaan wixii ku soo kordhaa www.Bartamaha.Com

Xafiiska www.Bartamaha.Com Ee Geeska Afrika

.

Comments

comments