Bartamaha(Muqdisho):-Kooxda Alshabaab ayaa maanta meel fagaara ah nin ku dishay mid kalana gacantiisa midig goysay markii Maxkamada Xaradaka Alshabaab la soo taagay oo xukunka uu ku dhacay.

Maxkamada ayaa waxaa maanta la soo taagay Laba nin oo mid ka mida la sheegay in uu qof horay u dilay halka midka kale uu xaday alaab kala duwan oo lagu qiimeeyay lacag dhan 300-$ .

Sheekk Cali Cumar oo ahaa Qaadigii Maxkamada Alshabaab ayaa fagaaraha ka sheegay in Maxkamada ay dil ku xukuntay Maxamed Axmed Qaasim oo la sheegay in uu horay qof u soo dilay.

Fagaarahihii ayaa lagula fuliyay ninkaasi dilka iyadoo ay daawanayeen dadka deegaanka Ti’da Degmada Dayniile Muqdisho waxaana goobta ku sugnaa dad ay ehehl wadaag yihiin ninka xukunka dilka ah uu ku dhacay.

Sidoo kale waxa ay Maxkamada xukun ku riday Shiine Abuukar oo ahaa nin xaday sida maxkamada sheegtay alaab ku qiimaysan 300-$ taasi oo sabab ka dhigtay in Maxkamada ay ku rido xukun gacan goys ah.

Goobka xukunka uu ka dhacayay ayaa waxaa ku sugnaa Saraakiil ka mida Alshabaab iyo dad badan oo shacab ah oo dhammaan daawanayay sida loo dilayo ninka iyo midka kale ee laga jarayay gacantiisa midig.

Horay ayaa waxaa Xukuno Islaami ah uga dheceen Magaalada Muqdisho oo ay fuliyeen Alshabaab iyadoo wadooyinka lagu suri jiray gacmaha iyo lugaha lagu soo jaro xukunada ay sameeyeen Alshabaab.

Xafiiska Wararka Soomaaliyeed www.Bartamaha.Com

Muqdisho-Somalia

Comments

comments