Masuuliyiinta masjidka Abubakar Al Sadiiq oo shir jaraa’id qabtay…

Bartamaha Feb.. 11 2009

 Sawirada Daawo

Maamulka masaajidka Abubakar Al Sadiiq oo ku yaala magaalada Minneapolis ee gobolka Minnesota, wadanka Maraykan ayaa shir jaraa’id oo ay qabteen maalintii talaadada 2/10/2009 waxay iska fogeeyen eedeeyno iyo far ku fiqii in muda ah lagu cambaareynayay masuuliyiinta masjidka Abdubakar. Waxaa masjaadika iyo maamulka lagu eedeynayaa in ay ka danbeeyeen ama ay lug ku leeyihiin maqnaanshaha dhalinyaro Soomaali ah oo ku noolaa labadda magaalo ee mataanaha ah Minneapolis/St. Paul ee gobolka Minnesota. Dhalinyarada oo tiradadooda wali la hubin  ayaa la tilmaamayaa in ay soo aadeen dalka Soomaaliya sanadkii dhamaaday ee 2008.

Ehelkii, qaraabadii iyo qoysaskii ay dhalinyaradi ka maqan yihiin ayaa ka walaacsan caruurtooda iyo Walaalahooda lagu tuhunsanyahy in ay aaden dalka Soomaaliya. Waxaa meesha ka hadlay dad tiro badan, matalayayna culumaa’u diinka, dhalinyarada, ardayda, ururada u adeega bulshada, qaar kamid ah dad weynaha ajnabiga ah ee dariska la’ah masaajidka iyo kuwo kale oo tiro badan.

Waxaa inta badan su’aalaha ku saabsan masaajid uga jawaabayey Sheekh Cabdirashid Cabdi oo ka mid ah masuuliyinta Masjidka, isaga oo shaaca ka qaaday in maamulka masaajidku ay la qeybsanayaan qoysaska iyo waalidiinta Soomaalida ah dhibaatada, walaaca iyo murugada ay guud ahaanba ku heyso arrinta ku saabsan maqnaanshaha caruutooda  iyo dhalinyaradda maqan gabi ahaan ba .Sheekh Cabdirashiid waxa kale oo uu sheegay in ay tahay wax laga xumaado eedeeyta ama fara ku fiiqa joogtadda ah ee  loo soo jeediyay Masjidka Abubakar Al Sadiiq oo ah goob lagu cibaadaysto, dhamaan bulshaduna ay og yihiin, kuna xiran yihiin.

Waxaa kale oo meesha ka hadlay Cabdullahi Farax oo ah maamulaha ama isku dubariddaha barnaamijka dhalinyarada ee masaajidka Abubakar Al Sadiiq. Cabdullahi ayaa waxa uu tilmaayay in lagu xad gudbay xuquuqdiisa shaqsi nimo ee uu leeyahay muwaadin ahaan. Waxa uuna sheegay in dowlada Mareykanku ayna wali wax cadeyn ah oo ku saabsan sababta looga reebay ama loogu diiday in uu u dhoofo xajka ayna siinin. Arrintan dhalinyaradana ay buun buuninayaan saxaafada oo arintani in mudo ah ku soo noqnoqtay iyo shaqsiyaad aanan rabin isku duubnida bushada gebi ahaanba.

Haddaba iyada oo dad kale ay meesha ka hadleen, ayaa guud ahaan maamulka masaajidku iyo dadkii meesha ka hadlayba ay dhamaan shaaca ka qaadeen masaajidka Abubakar in uusan lug ku lahayn eedaynta loo soo jeedinayo, wada shaqayn fiicana ay la samaynayaan shaqsiyaadka ka socda dowladda ee faraha kula jira baaritaanka arrinta dhaliyarada ee lagu tuhunsanyahay in ay u dhoofeen dalka Soomaaliya.

Daawo Sawirada

W/Q: Abdirahman “Abdirashiid” Mukhtar

Sawir Qaade: Mohamed “ Wiil Waal”